Խաղաղասիրական նախաձեռնությունների աջակցություն

ԱՐԵՆԱ խաղաղասիրական ցանցը հիմնադրվել է «Խաղաղության երկխոսություն» հասարակական կազմակերպության եւ իր գերմանական գործընկեր ՕՎԵՆ-ի «ԱՐԵՆԱ. Համայնքային թատրոն եւ հանրային արվեստ» եռամյա ծրագրի շրջանակներում։

2017թ․ օգոստոսի 18-ին Վիեննայում ԵԱՀԿ Ավստրիայի մշտական ներկայացուցչություն այցելեց Արենայի ամառային դպրոցի մասնակիցների պատվիրակությունը։ Հանդիպմանը ներկա էին նաեւ Ավստրիայի Հանրապետության եվրոպական ինտեգրման արտաքին գործերի նախարարության, ԵԱՀԿ-ում Ֆրանսիայի, Իտալիայի եւ Ֆինլանդիայի պատվիրակությունների ներկայացուցիչներ:

«Խաղաղության երկխոսություն» հասարակական կազմակերպության եւ իր գերմանական գործընկեր ՕՎԵՆ-ի կողմից իրականացվող «ԱՐԵՆԱ. Համայնքային թատրոն եւ հանրային արվեստ» ծրագրի շրջանակներում վերջին համատեղ հանդիպումը կայացավ օգոստոսի 14-21-ն «Խաղաղության եւ հակամարտությունների լուծման» ավստրիական ուսումնասիրությունների կենտրոնում (ASPR)՝ Շտադտշլայնինգում։ «Ստեղծագործական ռազմավարացում» խորագիրը կրող 7-օրյա ամառային դպրոցի ընթացքում ՌԴ-ն (Սանկտ Պետերբուրգը, Նովոչերկասկն ու Չեչնիան), Ուկրաինան, Հայաստանը, Ադրբեջանն ու Վրաստանը ներկայացնող 41 ակտիվիստներ համատեղ աշխատեցին սեփական պրոակտիվ խաղաղասիրական ռազմավարությունների ստեղծման վրա։

Արենայի համայնքն այժմ 80֊ից ավելի խաղաղասերների, մարդու իրավունքների ակտիվիստների, անկախ ստեղծագործողների, լրագրողների է միավորում ՌԴ տարբեր շրջաններից, Հայաստանից, Ադրբեջանից, Վրաստանից, Ուկրաինայից։ Հայաստանը, ՌԴ֊ն, Խորվաթիան, Լիբանանը, Նիդեռլանդները, Գերմանիան եւ Իտալիան ներկայացնող շատ ակտիվիստներ, ովքեր ծրագրի այս կամ այն թուլում ներգրավված են եղել որպես դասընթացավարներ, ֆասիլիտատորներ կամ խորհրդականներ՝ եւս ցանկացել են միանալ Արենայի համայնքին եւ ծրագրի մասնակիցներին հնարավորինս աջակցելու պատրաստակամություն են հայտնել։

Արենա ծրագրի անձնակազմը հավատում է, որ արվեստը լավագույն միջոցներից է հակամարտության ազդեցությունը կրող հասարակություններում հնչեցնելու գաղափարներ եւ բարձրաձայնելու այնպիսի կարեւոր խնդիրներ, ինչպեսիք են մարդու իրավունքները, ռազմականացումը, քարոզչությունը, սոցիալական անարդարությունը եւ այլն։