© 2022. ԼՈՒՍԱՆԿԱՐՆԵՐԸ` «ԽԱՂԱՂՈՒԹՅԱՆ ԵՐԿԽՈՍՈՒԹՅՈՒՆ» ՀԿ: ՀԵՂԻՆԱԿ` ԱՆՆԱ ԶՈՒՐԱԲՅԱՆ
2022թ. դեկտեմբերի 6-ին և 7-ին Երևանում տեղի ունեցավ «Պաշտպանական ոլորտի արդյունավետ կառավարումը և վերահսկողությունը» թեմայով կլոր սեղան-քննարկում, որն իրականացվեց Ժնևի Անվտանգության ոլորտի կառավարման կենտրոնի (DCAF) և «Խաղաղության երկխոսություն» հկ-ի համագործակցությամբ:
Միջոցառմանը մասնակցեցին պաշտպանական գերատեսչությունում վերոնշյալ հիմնահարցերի պատախանատուները, ՀՀ Ազգային ժողովի պատգամավորները և համապատասխան հանձնաժողովների փորձագետները, ինչպես նաև ոլորտում ներգրավված շահագրգիռ հասարակական կազմակերպությունների ներկայացուցիչները:
Հանդիպման մեկնարկին բացման խոսքով հանդես եկան ՀՀ պաշտպանության նախարարի տեղակալ Արման Սարգսյանը, Հայաստանում Գերմանիայի Դաշնային Հանրապետության դեսպան Վիկտոր Ռիխտերը և ՀՀ ՄԻՊ Քրեական արդարադատության ոլորտում և զինված ուժերում մարդու իրավունքների պաշտպանության դեպարտամենտի ղեկավար Հրանտ Ջիլավյանը, որոնք հայտնեցին իրենց երախտագիտությունը կազմակերպիչներին` բազմաթիվ շահագրգիռ կառույցների մասնակցությամբ նման քննարկում կազմակերպելու և իրականացնելու համար:
Քննարկման մասնակիցների ուշադրության կենտրոնում էին պաշտպանական ոլորտի բարեփոխումներին առնչվող բազմաթիվ հիմնախնդիրները, դրանց լուծման հնարավոր ուղղիները, ինչպես նաև նմանատիպ խնդիրների լուծման վերաբերյալ տեղական և միջազգային փորձագետների կողմից առաջարկված լավագույն փորձն ու քաղված դասերը:
Անդրադարձ կատարվեց հետևյալ հիմնախնդիրներին.
- պաշտպանության ոլորտում բարեվարքության ամրապնդմանը և զինվորական էթիկայի պահպանմանը,
- զինվորական անձնակազմի սոցիալական պաշտպանությանը,
- զինված ուժերում հոգեկան առողջությանը և ինքնասպանությունների կանխարգելմանը,
- պաշտպանական ոլորտում գենդերային ասպեկտների ինտեգրմանը և ոլորտում կանանց ակտիվ մասնակցության ապահովմանը,
- անվտանգության և պաշտպանական ոլորտում ռազմավարական հաղորդակցությանը,
- հետախուզական ծառայությունների իրավական շրջանակները (մասնավորապես՝ Հայաստանի արտաքին հետախուզական ծառայության մասին նոր օրենքի նախագծի տեսանկյունից), և այլն։
Քննարկման ավարտին մասնակիցները առաջարկեցին շարունակական դարձնել շահագրգիռ տարբեր կողմերի մասնակցությամբ նման ձևաչափով քննարկումները:
Կլոր սեղանն իրականացվել է Ժնևի Անվտանգության ոլորտի կառավարման կենտրոնի Հայաստանի աջակցության ծրագրի շրջանակներում և Գերմանիայի արտաքին գործերի նախարարության աջակցությամբ։
